Om as Sy Bruid te leef is so opwindend, Hy sorg vir ons, bederf ons en voorsien alles wat ons nodig het en begeer op die wonderlikste maniere! Hierdie jaar sal my kinders oor Kersfees en Nuwejaar by my wees, verlede jaar was hulle by my voormalige man en hulle het met vakansie gegaan.
In my kop 🎄was Kersfees nog ver, iewers in die nabye toekoms …. of dalk het my Man my net nie daaraan herinner nie omdat Hy op wonderlike maniere wou voorsien 😄Maar verlede naweek het Hy my wel herinner dat dit net ‘n week weg is. Ek het reeds al die geskenke gekoop wat ek wou, en dit is toegedraai🎁, maar ek het nog nie gedink wat ek en die kinders op Kersaand of Kersdag gaan doen nie, toe nooi my tannie (my peetma) ons Kersdag na haar huis toe vir ‘n groot familie fees. Ek het haar gevra wat ek moet bring, en sy het gesê niks (soos gewoonlik). Sy het wel genoem dat ons gaan braai en baie koue slaaie eet. Sy het wel genoem dat sy nog ‘n waatlemoen en ander vrugte moet gaan koop om vrugteslaai te maak, en ek het vir haar gesê om nie daaroor bekommerd te wees nie, ek sal dit kry en die slaaie maak.
Normaalweg styg alles se pryse voor Kersfees, maar my Man het my gelei om na ‘n klein vrugte- en groentewinkel te gaan en nie die supermark nie. Ek het soontoe gegaan en ‘n yslike waatlemoen gekry en alles wat ek nodig gehad het vir die helfte van die prys wat ek by die supermark sou betaal het!
Hy het my ook na ‘n winkeltjie gelei wat nogal weggesteek is in ons besigheidsentrum, ek het ingegaan en handelsmerk-toiletware teen halfprys gekry, net omdat die etiket of boks beskadig is. Ek kon genoeg van alles koop om vir my en die kinders by my huis te hou en ekstra koop om na hul pa se plek te stuur vir hulle om daar te gebruik.
Hy het my net so wonderlik gelei om al hierdie klein, weggesteekte winkeltjies te kry wat die helfte van die supermarkte se pryse vra, en Hy het my geseën met soveel van alles dat ek ook kan weggee.
Maar Hy het my ook gelei om net Kersaand saam met my kinders deur te bring, iets eenvoudigs vir aandete te maak, en Kersflieks te kyk met baie springmielies … net ek, Hy en die kinders … klink vir my soos geluk.🎄🎁💖