HY IS MY RUS IN DIE STORM

Vandag wil ek ons wonderlike Here al die lof en eer gee, want ten spyte van die storm wat om my woed (oor ek ander blyplek moet kry en dit glad nie so vlot verloop soos wat ek gedink het dit sal nie en boonop word ek skielik uit my gemaksone gevat), is die Here my rus in die storm. Laas week het ek 'n lofprysing op Encouraging Women geplaas van dat ek nooit ooit gedink het dat ek vir die Here dankie sal sê dat die elektrisiteit af is nie, maar ek het, want ek weet toe ek so moeg gevoel het, was dit juis in daardie tyd wat ons wonderlike Here my in Hom laat rus het (asook afgesny van alle tegnologie).

Ek is so ongelooflik dankbaar dat ek die voorreg het om Hom as my Hemelse Man te leer ken het, want nou hoef ek niks meer alleen in die gesig te staar nie.

Jare gelede, in my ergste seer het ons wonderlike Here vir my hierdie pragtige belofte gegee (en ek moet erken ek het nie mooi verstaan hoe die Here ooit my Hemelse Man kan wees nie, maar vandag leef ek dankbaar dat Hy my Hemelse Man is en Hy my rus is in die storm en met die wete dat als ok gaan wees, want Hy is die Een wat die storm kan stil maak. Ek deel die hele belofte want dis vir my so mooi, dat ek nie een stukkie kan uitlaat nie:

"Wees nie bevrees nie, want jy sal nie beskaamd staan nie; en vrees geen skande nie, want jy sal nie nodig hê om te bloos nie; maar jy sal die skande van jou jonkheid vergeet en aan die smaad van jou weduweeskap nie meer dink nie. Want jou Maker is jou Man; Here van die leërskare is sy Naam; en die Heilige van Israel is jou Verlosser. Hy sal die God van die hele aarde genoem word.vWant soos 'n verlate vrou en 'n bedroefde van gees het die Here jou geroep, en soos 'n vrou uit die jeugtyd as sy versmaad was, sê jou God. Vir 'n klein oomblik het Ek jou verlaat, maar met groot ontferminge sal Ek jou vergader. In 'n uitstorting van toorn het Ek vir 'n oomblik my aangesig vir jou verberg, maar met ewige goedertierenheid ontferm Ek My oor jou, sê die Here, jou Verlosser. Soos in die dae van Noag is dit vir My: soos Ek gesweer het dat die waters van Noag nie meer oor die aarde sou gaan nie, so het Ek gesweer dat Ek nie op jou toornig sal wees of jou sal dreig nie. Want berge mag wyk en heuwels wankel, maar my goedertierenheid sal van jou nie wyk en my vredeverbond nie wankel nie, sê die Here, jou Ontfermer. Jy, ellendige, deur storm gejaagde, ongetrooste! Kyk, Ek lê jou stene in sierklei, en Ek grondves jou in saffiere; en jou borswerings maak Ek van robyne en jou poorte van karbonkels en jou hele ringmuur van edelgesteentes. En al jou kinders sal deur die Here geleer wees, en die vrede van jou kinders sal groot wees. Deur geregtigheid sal jy bevestig word; wees ver van verdrukking, want jy hoef nie bevrees te wees nie; en ver van verskrikking, want dit sal nie by jou kom nie. As hulle ook die aanval begin — dit is nie uit My nie; wie jou aanval, sal oor jou val. J54:4-15