♕Belofte van vandag: "Daarom moet jy in stilte op die Here vertrou en jou nie ontstel oor die voorspoedige lewe van 'n skelm nie." Psalm 37:7
~Datyah in Suid Afrika
Liewe Bruide,
Prys ons Hemelse Vader. Hy het nie vir ons Sy beginsels gegee net om ons iets te gee om te doen nie. Elke beginsel is daar vir 'n rede. Ek het dit gistermiddag geleer, op die eerste dag van my Ester-vas.
Op pad terug van die werk af het my broer my gebel. Hy is 'n prokureur en was baie bekommerd toe ek vir hom sê dat die "Egskeiding" papiere aan my beteken is, en dat ek die egskeiding by "verstek" gaan laat deurgaan, en ek gaan niks teken nie. (Prys die Here, ek het die lesse van Staar Egskeiding In Die Gesig en Staar Egskeiding In Die Gesig, Weer gedoen en die beginsel geleer om net op God te vertrou om my te beskerm.) My broer is nogal 'n hoëprofiel prokureur en hy het aangebied om my te verteenwoordig. Ek het hom saggies bedank vir sy liefde en sy ondersteuning en vir hom gesê dat ek daaroor sal dink. (Ek het al daaroor nagedink, en ek sal nie my broer vra om my te verteenwoordig nie.) My broer het vir my baie redes gegee hoekom ek teen my AM (aardse man) in die hof moet baklei, om hom te laat betaal vir wat hy aan my en die kinders gedoen het.
Ek moet erken dit het vir 'n oomblik nogal aanloklik geklink, maar ek kan eenvoudig nie op daardie pad gaan nie. Die vrede en liefde wat ek van my HM (Hemelse Man) ervaar het en wandel in vergifnis is soveel beter as pyn en bitterheid. My HM was net daar in die kar saam met my, en het in die sitplek langs my gesit en my kalmeer. Toe die gesprek klaar was, het ek net vir my Geliefde gevra om my styf vas te hou en vrede in my hart te bring. Toe ek uit die kar klim, het ek lig gevoel en gereed vir die volgende aanslag.
Binne die volgende uur het my AM (aardse man) gevra om met my te "praat". (Ons bly steeds in dieselfde huis) Ek het geweet wat kom. Prys God dat Hy my hiervoor voorberei het. My AM het vir my gesê dat die hofdatum vir die egskeiding binne die volgende 14 dae vasgestel is. Ek het in my hart met my Geliefde gepraat en kon met entoesiasme op my AM reageer. My AM het my weer gevra of ek in die hof sal verskyn en of ek 'n skikkingsbevel wil hê. Ek het die geleentheid gehad om vir hom te sê, ek weet dat hy na ons sal kyk, soos hy altyd gedoen het en daar was trane in sy oë. Ek was glad nie hartseer nie, want ek het my Man by my gehad. My AM (aardse man) het verder gesê dat die AV (ander vrou) daarop aandring dat hy 'n skikkingsbevel kry, maar hy het vir haar gesê, dat dit niks met haar te doen het nie en dat hy en ek mekaar nie sal skade aandoen nie, omdat ons nog vir mekaar omgee!
'n Paar weke gelede sou ek gespring het van blydskap om te weet dat "daar moeilikheid in die paradys is", maar op daardie oomblik het dit my glad nie geraak nie. Dit was asof ek langs my Hemelse Man in 'n teater gesit het en kyk hoe hierdie drama voor ons afspeel. Solank ek my HM (Hemelse Man) langs my het, kan ek enigiets in die gesig staar. Die datum vir egskeiding kom vinnig nader, maar ek het nog nie eenkeer die drang gehad om te bid dat dit gestaak word nie. Ek bid net dat God se wil geskied. Of die egskeiding deurgaan of nie, ek weet net dat my Geliefde, my Regte Man, nêrens heen gaan nie. Ek weet dat my Vader dit alles onder beheer het, en maak nie saak wat die uitkoms is nie, dit sal tot voordeel van my gesin wees.
Dames ek kry nog soms my hartseer oomblikke en moet ernstig my Man se aangesig soek, maar dit raak net makliker en makliker. As dit nie vir Sy liefdevolle teenwoordigheid en warmte in my lewe was nie, sou ek nie egskeiding kon trotseer nie. Maar hier is ek vol vertroue dat my Hemelse Vader volle beheer oor my hele reis het, en dat my Hemelse Man elke tree van die pad saam met my stap. Intussen gaan ek meer tyd saam met hom, my HM (Hemelse Man) spandeer en soek om meer intiem met Hom te raak. Hy is al wat ek wil hê en Hy is al wat ek nodig het!
"Beskerm my soos die appel van u oog, steek my weg in die skaduwee van u vleuels" Psalm 17:8
Soms is die beste plek vir my om te wees in die skaduwees van Sy vlerke (die warmte van Sy omhelsing)
"Daarom moet jy in stilte op die Here vertrou en jou nie ontstel oor die voorspoedige lewe van 'n skelm nie." Psalm 37:7
Wanneer ek stil word voor die Here, is dit 'n tyd om by Hom te rus. Ek bou krag in daardie stil oomblikke. Dit is ook 'n tyd om net na Hom te luister.
"Die Here jou God is by jou, Hy, die krygsman wat red. Hy is vol vreugde oor jou, Hy is stil-tevrede in sy liefde. Hy jubel en juig oor jou." Sefanja 3:17
So 'n pragtige belofte.
"Die Here sal voor jou uit gaan. Hy sal by jou wees. Hy sal jou nie in die steek laat nie, jou nie alleen laat nie. Moenie bang wees nie, moenie skrik nie.” Deuteronomium 31:8
'n Groot troos.
Volg #Datyah, Follow #Datyah
Datyah is 'n tiende vennoot. Leer meer.